chand manga na kabhi ham ne sitare mange
bas vo do din jo tire saath guzare mange
sirf ik dagh-e-tamanna ke siva kuchh na mila
dil ne kiya soch ke nazron ke ishare mange
ham ne jab jaam uThaya hai to vo yaad aaya
jis ki ḳhatir mai-o-mina ke sahare mange
Dhal ga.i raat to ḳhvab-e-ruḳh-e-janan TuuTa
bujh gaya chand to ankhon ne sitare mange
uTh ga.i aankh to gardab ka dil Duub gaya
khul ga.i zulf to maujon ne kinare mange
raat vo hashr gulistan men uTha hai yaaro
subah har phuul ne shabnam se sharare mange
Leave a Reply