Dil Hi Dil Mein Sulag Ke Bujhe Hum Aur Sahe Gham Dur Hi Dur

dil hi dil men sulag ke bujhe ham aur sahe gham duur hi duur

tum se kaun si aas bandhi thi tum se rahe ham duur hi duur

tum ne ham ko jab bhi dekha shukr-ba-lab the ya ḳhamosh

yuun to aksar ro.e lekin chhup chhup kam kam duur hi duur

jal jal bujh ga.i konpal konpal kya kya arman ḳhaak hue

ankhen to bhar laa.e pa badal barse chham-chham duur hi duur

ek vo aan ki un ki zara si baat gavara kar na sake

ek ye haal ki yaad men un ki ro.e paiham duur hi duur

tark-e-talab par ḳhush the ki aḳhir kaam liya dana.i se

kis ko ḳhabar hai jalte rahe tum jalte rahe ham duur hi duur