Mani Jayasi
maut haan bar-haq hai lekin zindagi faani kahan
qissa-e-hasti ba-anjam-e-tan-asani kahan
aap ke sajde men ruh-e-sajda ai ‘mani’ kahan
kaash ye ehsas hota ḳham hai peshani kahan
mushkilon se ruuh ko manus hona chahiye
zindagi dushvariyon hi men hai asani kahan
ai zuleḳha bartar-az-insaniyat ka zikr chhoḌ
dard se begana rahna kar-e-insani kahan
tishna-e-maqsud dhokha hai jhalak ummid ki
sirf ik manzar sarab-asa hai ye paani kahan
kaaT di bistar pe angaron ke saari zindagi
ai tamanna is se baḌh kar koi qurbani kahan
manzil-e-hairat men laaya imtihan-e-tab-e-did
dekhiye le ja.egi ab dil ki hairani kahan
kasrat-o-vahdat men nisbat hai shua-o-shams ki
ek hi jalva hai jalvon ki faravani kahan
miT ke mere ghar ki raunaq alam-e-ibrat bani
dasht bhi viran hai lekin naf-e-virani kahan
aish-e-azadi kabhi milta to hota ranj-e-qaid
mustaqil jam.iyat-e-dil hai pareshani kahan
ye faza-e-fikr ai ‘mani’ hai me.araj-e-suḳhan
ab magar taḳh.il men vo barq-samani kahan
Leave a Reply