Adeem Hashmi
usi ek fard ke vaste mire dil men dard hai kis liye
miri zindagi ka mutaliba vahi ek fard hai kis liye
tu jo shahr men hi muqim hai to musafirat ki faza hai kyuun
tira karvan jo nahin gaya to hava men gard hai kis liye
na jamal-o-husn ki bazm hai na junun o ishq ka azm hai
sar-e-dasht raqs men har ghadi koi badgard hai kis liye
tire husn se ye pata chala tujhe dekh kar ye khabar hui
jahan rasta hi nahin koi vahan rah-navard hai kis liye
jo likha hai mere nasib men kahin tu ne padh to nahin liya
tira haath sard hai kis liye tira rang zard hai kis liye
vo jo tark-e-rabt ka ahd tha kahin tutne to nahin laga
tire dil ke dard ko dekh kar mire dil men dard hai kis liye
koi vasta jo nahin raha tiri aankh men ye nami hai kyuun
mire gham ki aag ko dekh kar tiri aah sard hai kis liye
Leave a Reply