ban ban kar aaj vasl ki surat bigaḌ ga.i
vo kya bigaḌ ga.e miri qismat bigaḌ ga.i
kahte hain aaj duḳhtar-e-saqi ko dekh kar
zahid se parsa ki bhi niyyat bigaḌ ga.i
achchhe bane ḳhuda ki qasam vo shab-e-visal
ye kah ke so ga.e ki tabi.at bigaḌ ga.i
bose ke badle dil unhen deta to ḳhuub tha
afsos len-den ki surat bigaḌ ga.i
‘sabir’ ke samne hue aise zalil ghair
izzat to kya hai un ki haqiqat bigaḌ ga.i
Leave a Reply