Tahir Adeem
vo dard vo vafa vo mohabbat tamam shud
le dil men tere qurb ki hasrat tamam shud
ye ba.ad men khulega ki kis kis ka ḳhuun hua
har ik bayan ḳhatm adalat tamam shud
tu ab to dushmani ke bhi qabil nahin raha
uThti thi jo kabhi vo adalat tamam shud
ab rabt ik naya mujhe avargi se hai
pabandi-e-ḳhayal ki aadat tamam shud
jaa.ez thi ya nahin thi tire haq men thi magar
karta tha jo kabhi vo vakalat tamam shud
vo roz roz marne ka qissa hua tamam
vo roz dil ko chirti vahshat tamam shud
vo mere qurb men hai bahut be-sukun sa
us ke sukun ko hai qarabat tamam shud
ab aa ki apna apna asasa sameT len
ab ham pe vaqt ki hai saḳhavat tamam shud
‘tahir’ main kunj-e-zist men chup-chap huun paḌa
majnun si vo ḳhajalat-o-halat tamam shud
Leave a Reply