Saleem Ahmed
majburiyon ka paas bhi kuchh tha vafa ke saath
vo raste se phir gaya kuchh duur aa ke saath
qurb-e-badan se kam na hue dil ke fasle
ik umr kaT ga.i kisi na-ashna ke saath
saath us ke rah sake na baghair us ke rah sake
ye rabt hai charagh ka kaisa hava ke saath
main jhelta raha huun azaab is ka umr bhar
bachpan men ek ahd kiya tha ḳhuda ke saath
pahle to ek ḳhana-e-viran ka shor tha
ab dil bhi gunjta hai ḳharosh-e-hava ke saath
ye rang-e-dast-e-naz yunhi to nahin ‘salim’
dil ka lahu bhi sarf hua hai hina ke saath
Leave a Reply