teri ḳhvahish na jab ziyada thi
zindagi jaise be-libada thi
is liye mujh ko mil ga.i manzil
meri ḳhvahish mira irada thi
ek titli jale paron vaali
bas vahi mera ḳhanvada thi
main ne dekha hai vo nagar bhi jahan
raushni kam nazar ziyada thi
chal ke ik umr mujh pe raaz khula
meri manzil hi mera jaada thi
jis men rahte the sab mohabbat se
vo haveli bhi kya kushada thi
duur tha is liye mahaz se main
fauj meri ki pa-piyada thi
sang tha ya ki raste men ‘nabil’
koi divar istada thi
Leave a Reply