akhtar-ansari

Sada Kuchh Aisi Mere Gosh-e-dil Mein Aati Hai

sada kuchh aisi mire gosh-e-dil men aati hai

koi bina-e-kuhan jaise laḌkhaḌati hai

racha hua hai fazaon men ek athah hiras

dimagh shal hai magar ruuh sansanati hai

mujhe yaqin hai andhi koi uThi hai kahin

ki lau charagh-e-shabistan ki thartharati hai

umiid yaas ke gahre ḳhamosh jangal men

hava-e-sham ki manind sarsarati hai

saval hai gham-e-hasti ke biit jaane ka

ye zindagi to bahar-hal biit jaati hai

ḳhayal-e-umr-e-guzishta zara tavaqquf kar

zamin qadmon ke niche se nikli jaati hai

main apni aag men jal kar kabhi ka ḳhaak hua

ye zindagi mujhe kya ḳhaak men milati hai

nishana-baz falak tere navakon ki ḳhair

ki jin ki zad pe mire hauslon ki chhati hai

lachak hi jaati hai shaḳh apne ashiyan ki bhi

chaman men gaati hui jab bahar aati hai

fughan-e-dard labon par na aaiyo zinhar

miri saliqa-shi.ari pe baat aati hai

idhar ye girya-e-abr aur udhar vo ḳhanda-e-barq

mizaj-e-dahr mire dost tanziyati hai

rahin-e-rasm-o-rivayat ho jis ki but-shikani

vo but-shikan bhi haqiqat men somnati hai

bapa hai shor-e-qayamat dimagh men ‘aḳhtar’

zaban-e-ḳhama magar zamzame luTati hai

More Poems

Leave a Comment