sach ka lamha jab bhi nazil hota hai
kitni uljhan men apna dil hota hai
meri ḳhushi ka bhed hai bas ye sab ka dukh
mere apne dukh men shamil hota hai
ilm ki mere yaar sanad pahchan nahin
bahut paḌha likkha bhi jahil hota hai
sayyad-zade dil mango ya dad-e-hunar
saa.il to har haal men saa.il hota hai
biit ga.i jab umr to ye malum hua
ek ishara umr ka hasil hota hai
ek hansi lachari ko kuchh aur baḌha.e
ek hansi se dushman gha.il hota hai
ai mire dil ai achchhe dil ai ḳhana-ḳharab
tu kyuun har takrar men shamil hota hai
sah len ham duniya ke sitam ‘shahin’ magar
ziddi dil har aan muqabil hota hai
Leave a Reply