mitti se baghavat na baghavat se gurezan
ham sahme hue log hain himmat se gurezan
ik pal ka tavaqquf bhi giran-bar hai tujh par
aur ham ki thake-hare masafat se gurezan
ai bhule hue hijr kahin mil to sahi yaar
ik duuje se ham donon hain muddat se gurezan
ja tujh ko koi jism se aage na padhega
ai mujh se khafa meri mohabbat se gurezan
ai zinda bache shakhs ye sab le ke palat ja
ham jang men hain mal-e-ghanimat se gurezan
Leave a Reply