Shahnaz Parveen Sahar
ashk tham ga.e honge dil sambhal gaya hoga
jaane kaun saa.at phir dam nikal gaya hoga
itni aag to sahab puura ghar jala degi
aanch dhimi kar liije duudh ubal gaya hoga
maang ujaḌne vaalo god kya ujaḌoge
maan gharib ho kar bhi la.al pal gaya hoga
ajnabi ḳhalaon men Daar se bichhaḌte hi
jaal bichh ga.e honge vaar chal gaya hoga
na-murad rahon par lauT kar bhi kya aate
be-ghari ke maron ka ghar badal gaya hoga
maut ke andhere men vaqt tham gaya hoga
raat bujh ga.i hogi din bhi Dhal gaya hoga
bad-guman hathon men kis ne di kaman aḳhir
ḳhud hi the nishane par tiir chal gaya hoga
muztarib ḳhayali men kab ḳhayal rahta hai
roTiyan pakane men haath jal gaya hoga
ab ke shaam aa.i hai jaane kin zaminon par
kaun se jahanon men din nikal gaya hoga
Leave a Reply