karte rahen vabasta un se chahe jo afsane log
ishq men rusva.i ki parva karte hain kab divane log
kis ko sada.en deta hai tu shahr-e-tamanna men ai dil
kaun yahan hai tera sathi sabhi to hain begane log
kis ko suna.en hal-e-tabahi kis ko dikha.en zaḳhm-e-jigar
daur-e-sitam hai rahm kahan ab zulm ke hain divane log
shaiḳh-o-barahman ki baton men dair-o-haram ke jhagḌe hain
chaal men in ki phir kyuun aa.en ham jaise mastane log
faiz-e-junun se jaag uTha hai aaj muqaddar sahra ka
phuul khilate hain is men bhi dekhiye kuchh divane log
bachte hue sab se aa.e the mahfil-e-zindan ki janib
mil hi ga.e uf ham ko yahan bhi kuchh jaane pahchane log
ahl-e-junun ke faiz se kashfi duniya men bedar hi hai
baat pate ki kah dete hain akasr ye divane log
Leave a Reply