main raste men jahan Thahra hua tha
vahin to dhuup ka chehra khila tha
sabhi alfaz the meri zaban ke
magar main ne kahan kuchh bhi kaha tha
vo kis ke jism ki ḳhushbu thi aḳhir
hava se tazkira kis ka suna tha
samundar men bahut halchal thi ik din
safina kis ka Duuba ja raha tha
ki jaise ḳhvab sa dekha tha koi
bas itna yaad hai koi mila tha
khanDar men ghumti phirti thiin yaden
udasi ka ajab manzar saja tha
miri miTTi ki himmat baḌh ga.i thi
mire raste men dariya aa gaya tha
Leave a Reply