Rahat Hasan
is se behtar miri tasvir nahin ho sakti
zat-e-be-aib se taqsir nahin ho sakti
kuchh to hai ḳhaas asiri men latafat varna
sab ko darkar yuun zanjir nahin ho sakti
mujh ko dhundla sa koi ḳhvab nazar aaya hai
ab sahar hone men taḳhir nahin ho sakti
apni bina.i se raushan rakho ankhen apni
har kisi ghaar men tanvir nahin ho sakti
kaisi uljhan hai ki jis shai ki talab hai mujh ko
vo kisi shaḳhs ki jagir nahin ho sakti
jab qalam haath men aaya to ye jaana main ne
mujh se halat meri tahrir nahin ho sakti
ye bharose ki hai buniyad bhi lazim ‘rahat’
yuun imarat koi ta.amir nahin ho sakti
Leave a Reply