jaane kya soch ke us ne sitam ijad kiya
ḳhud bhi barbad hua mujh ko bhi barbad kiya
sham.a ki tarah jale ham tiri mahfil men magar
tu ne kis vaqt hamen kaun si shab yaad kiya
jumbish-e-lab ki ijazat hai na izn-e-parvaz
kis liye tu ne mujhe qaid se azad kiya
shukr hai tu ne mujhe dard ke qabil samjha
teri paiman-shikani ne mira dil shaad kiya
haa.e us shaḳhs ki ḳhatir-shikani hoti hai
jis ne apne ko tiri yaad men barbad kiya
apni barbadi pe nazan bhi huun hairan bhi huun
sham.en raushan huiin jab main ne tujhe yaad kiya
tujh ko ye naaz ki to ḳhaliq-e-naghma hai ‘ḳhayal’
mujh ko ye faḳhr ki tu ne mujhe barbad kiya
Leave a Reply