Nazeer Akbarabadi
duur se aae the saaqi sun ke mai-khane ko ham
bas taraste hi chale afsos paimane ko ham
mai bhi hai miina bhi hai saghar bhi hai saaqi nahin
dil men aata hai laga den aag mai-khane ko ham
kyuun nahin leta hamari tu khabar ai be-khabar
kya tire ashiq hue the dard-o-gham khane ko ham
ham ko phansna tha qafas men kya gila sayyad ka
bas taraste hi rahe hain aab aur daane ko ham
taq-e-abru men sanam ke kya khudai rah gai
ab to pujenge usi kafir ke but-khane ko ham
baagh men lagta nahin sahra se ghabrata hai dil
ab kahan le ja ke baithen aise divane ko ham
kya hui taqsir ham se tu bata de ai ‘nazir’
taaki shadi-marg samjhen aise mar jaane ko ham
Leave a Reply