ghubar-o-gard ne samjha hai rahnuma mujh ko
talash karta phira hai ye qafila mujh ko
tavil rah-e-safar par hain phuuT phuuT paḌa
na kyuun samajhte mire pair aabla mujh ko
shikast-e-dil ki sada huun bikhar bhi jaane de
ḳhutut-o-rang ki zanjir mat pinha mujh ko
zamin par hai samundar falak pe abr-e-ghubar
utarti hai kahan dekhiye hava mujh ko
sukut tark-e-ta.alluq ka ik garan lamha
bana gaya hai sadaon ka silsila mujh ko
vo duur duur se ab kyuun mujhe jalata hai
qarib aa ke bahut jo bujha gaya mujh ko
racha ke ek tilism-e-savabit-o-sayyar
kashish men apni bulane laga ḳhala mujh ko
Leave a Reply