avaz de ke ḳhud ko bulana paḌa mujhe
apni madad ko aap hi aana paḌa mujhe
mujh se tumhare aks ko karta tha bad-guman
a.ina darmiyan se haTana paḌa mujhe
phir is ke ba.ad jur.at-e-girya nahin hui
ik ashk ḳhaak se jo uThana paḌa mujhe
phir yuun hua ki jhuuT ki aadat si ho ga.i
phir yuun hua ki sach ko chhupana paḌa mujhe
paani qubul hi nahin karta tha meri laash
dariya ko apna naam batana paḌa mujhe
mehman aa gaya tha so khane ki mez par
jalta hua charagh bujhana paḌa mujhe
dharti ke zarf ka hua andaza jab ‘munir’
kuchh roz apna bojh uThana paḌa mujhe
Leave a Reply