thi mohabbat ki kar-farma.i
varna main aur nasiya-sa.i
chashm-o-abru ke hadsat vahi
aur vahi uzr-e-na-shakeba.i
vo tamanna ka ḳhuun sahi lekin
dil men ik buund to nazar aa.i
mere hamraz ye nasheb-o-faraz
allah allah gham ki gahra.i
zindagi hai ki ek mauj-e-sarab
dur-tar ḳhub-tar nazar aa.i
ab gareban pe dekhen kya biite
chand ki raat phir palaT aa.i
baḌhti jaati hain dhaḌkanen dil ki
kis ne taklif-e-naz farma.i
jiit li jis ne dil ki arz-e-pak
ek aisi shikast bhi khaa.i
ishq ki aag be-panah sahi
husn par aanch bhi kabhi aa.i
baiThe baiThe na jaane kyon apni
aankh be-iḳhtiyar bhar aa.i
dam na ehsas ka ulaT jaa.e
rain andheri hai aur tanha.i
Leave a Reply