log jo sahab-e-kirdar hua karte the
bas vahi qabil-e-dastar hua karte the
ye alag baat vo tha daur-e-jahalat lekin
log an-paḌh bhi samajhdar hua karte the
samne aa ke nibhate the adavat apni
piiTh pichhe se kahan vaar hua karte the
jin qabilon men yahan aaj diye hain raushan
un qabilon ke to sardar hua karte the
tab adalat se ri.ayat nahin mil paati thiin
tab gunahgar gunahgar hua karte the
kya zamana tha mahakti thiin vo kyari ghar ki
ghar ke angan gul-o-gulzar hua karte the
qaid maz.hab ki na thi kal ke paḌosi donon
ek duuje ke madad-gar hua karte the
ghar ke sab log nibhate the ḳhushi se jin ko
ghar ke har fard ke kirdar hua karte the
Leave a Reply