Tahir Adeem
maujudgi ka us ki yahan e’tiraf kar
ai ka.aba-e-jahan mire dil ka tavaf kar
kab tak fusun men mausam-e-yaksaniyat rahe
ai ra.ij-ul-jahan naya inkishaf kar
is talḳhi-e-hayat ke lamhon ka har qusur
main ne muaaf kar diya tu bhi muaaf kar
parda paḌa hai shahr ki jab aankh aankh par
tera bhi haq hai sach se mire iḳhtilaf kar
main sach huun aur samne tere khaḌa huun main
karna hai meri zaat se ab inhiraf kar
main ḳhud pe oḌhta huun tire pyaar ki rida
tu ḳhud pe meri chaah ka ujla ghilaf kar
le ek ek shaḳhs mira ham-zaban hai
ja ek ek shaḳhs ko mere ḳhilaf kar
tab aks aks ujla nazar aa.ega tujhe
tu a.ina-e-dil pe jami gard saaf kar
ban kar shua-e-shisha-e-manshur dil pe paḌ
rangon ka ik jahan liye in.etaf kar
chadar tamazaton ki liye din ke dil men chal
tanha.iyon ko shab ke jigar men lihaf kar
is mohr-band ishq ko tu bhi hava laga
‘tahir-adim’ tu bhi koi iktishaf kar
Leave a Reply