buland azm ho gaya paron men kaat aa gai
hava to aur taeron ki himmaten badha gai
khilega dil ka phuul bhi zara sa intizar kar
abhi ye jan-faza khabar saba mujhe suna gai
hisar-e-zat se pare jahan ek aur hai
mujhe ye vusat-e-nazar naya ufuq dikha gai
banae the jo aarzu ne sahilon pe baith kar
tamam ret ke vo ghar bas ek mauj Dha gai
hamen to khauf tha yahi ki khaak kar na den kahin
lagi jo aag ishq ki to aina bana gai
parae anchalon men vo to chhanv DhunDhta raha
idhar hava-e-be-rahm rida miri uda gai
chalo ki kal milenge phir ye qisse kal pe chhod do
zamin pe qumqume jale falak pe raat chha gai
jo ‘nusrat’ aaj kho gai udasiyon men do ghadi
guman sab ko ye hua ghamon se maat kha gai