Habeeb Kaifi
kya hoga jab mar ja.enge
apne apne ghar ja.enge
baat ko poshida rahne de
baat khuli to sar ja.enge
qatl kiye do-char to socha
ham bhi tujh se Dar ja.enge
chahne vaale tere ik din
chaukhaT par sar dhar ja.enge
us ki janib jaane vaale
le kar jalte par ja.enge
sadiyan yaad karengi ham ko
kaam aise kuchh kar ja.enge
ban ja.enge yaad ka hissa
jab ham tujh par mar ja.enge
jaisi paa.i ham ne tujh se
chadar vaisi dhar ja.enge
Leave a Reply