Mere Gham Ka Asar Zara Na Hua

mere ġham kā asar zarā na huā

ye to patthar huā ḳhudā na huā

dekh lo aaj aa ke bismil ko

kaun jaane ye kal huā na huā

tark-e-ulfat kā ek hī ġham hai

ye irāda bhī der-pā na huā

tirchhī chitvan utar ga.ī dil meñ

tiir kaj thā magar ḳhatā na huā

jazba-e-shauq ho gayā dushman

mujh se iz.hār-e-mudda.ā na huā

vaqf-e-gardish huuñ sūrat-e-parkār

duur markaz kā fāsla na huā

lauh-e-hastī se kyoñ miTāte ho

maiñ kabhī harf-e-mudda.ā na huā

Leave a Comment