Varis Kirmani
kho.e hue sahra tak ai bad-e-saba jaana
vo ḳhak-e-junun meri a.ankhon se laga jaana
ab tak koi chingari rah rah ke chamakti hai
ai qafila-e-farda ye raakh uḌa jaana
hai dasht-e-tamanna men ab shaam ka sannaTa
haan tez qadam rakhte ai ahl-e-vafa jaana
ham niind ki chadar men lipTe hue chalte hain
is bhes men ab ham se milna ho to aa jaana
afaq ki sarhad par saa.e se gurezan hain
in soḳhta-janon ko us paar na tha jaana
tum duur safar kar ke nazdik se lagte ho
ab paas bahut aa ke ham ko na jaga jaana
kya us se shikayat ho jis shoḳh ki aadat ho
kuchh baat daba lena kuchh aankh chura jaana
ham zikr-e-gul-o-bulbul karte hue Darte hain
ab siikh gaya hai vo har baat ka pa jaana
Leave a Reply