Bakhsh Layalpuri
mire har lafz ki tauqir rahne ke liye hai
main vo zinda huun miri tahrir rahne ke liye hai
sitam-gar ne jo pahna.i mire dast-e-talab men
ye mat samjho ki vo zanjir rahne ke liye hai
mira a.ina-e-tasnif deta hai gavahi
mira har nuqta-e-tafsir rahne ke liye hai
rahega to na tera zulm par roz-e-abad tak
hamare dard ki jagir rahne ke liye hai
jise miir nigahon ne kabhi dekha nahin hai
mire dil men vahi tasvir rahne ke liye hai
sar-e-batil kiya do-laḳht jis ne bhi jahan men
salamat bas vahi shamshir rahne ke liye hai
junun-e-shauq taḳhrib-e-jahan miT kar rahega
magar har jazba-e-ta.amir rahne ke liye hai
na likkha sher koi aur samajh baiThe hain nadan
adab men harba-e-tash.hir rahne ke liye hai
guzar ja.enge ham dar-e-fana se ‘baḳhsh’ lekin
hamare shahr ki tasir rahne ke liye hai
Leave a Reply