lab chup hain to kya dil gila-pardaz nahin hai
sab kuchh hai ḳhamoshi men ik avaz nahin hai
kitna hi vo jhiḌken main kahe jaata huun apni
ghairat miri ab kuchh ḳhalal-andaz nahin hai
pahuchunga zarur aaj main us shoḳh ke ghar men
divar to nichi hai jo dar-baz nahin hai
is samt maraz ishq ka anjam ko pahuncha
is samt tavajjoh ka bhi aghaz nahin hai
kya sada-dili hai ki tiri chin-e-jabin ko
main naaz samajhta huun magar naaz nahin hai
marna tha ki sehat maraz-e-ishq se paa.i
ab kuchh bhi tabi.at na-saz nahin hai
kyuun sach ye kaha us ne ki ulfat nahin mujh se
ye aib hi zalim men ki dam-baz nahin hai
rote hue jiine se ajal ishq men achchhi
murde men ye ḳhubi hai ki ghammaz nahin hai
zillat mujhe manzur magar aa.uun tire ghar
kya harj mohabbat ka jo e.azaz nahin hai
kyuun baiThe hain ham vada-e-mahbub pe ḳhush ḳhush
kya kho.e talavvun bhi dar-andaz nahin hai
ai ‘shauq’ kahe deti hai kuchh shakl ḳhamoshi
chup kyuun ho agar dil men koi raaz nahin hai
Leave a Reply