ka.i jalve tiri pahchan ke dhoke se nikle hain
siyasat sainkaḌon chehre tire chehre se nikle hain
hamare daur ke bachche sabaq paḌhte hain chahat ka
kitabon ke baja.e dil har ik baste se nikle hain
har ik bhaa.i ki ḳhvahish hai ki baTvara ho ab ghar ka
abhi ham mulk ki taqsim ke sadme se nikle hain
idhar dekho yahan maan hai udhar hai baap bachchon ka
zamane bhar ke sab rishte isi rishte se nikle hain
rasan tak koi jaata hai koi maqtal talak ‘hafiz’
jo raste husn valon ke hasin kuche se nikle hain
Leave a Reply