hava-e-sham na jaane kahan se aati hai
vahan gulab bahut hain jahan se aati hai
ye kis ka chehra damakta hai meri ankhon men
ye kis ki yaad mujhe kahkashan se aati hai
isi falak se utarta hai ye andhera bhi
ye raushni bhi isi asman se aati hai
ye kis ne ḳhaak uḌa di hai lala-zaron men
zamin pe aisi tabahi kahan se aati hai
sada-e-girya jise ek main hi sunta huun
hujum-e-shahr tire darmiyan se aati hai
Leave a Reply