ham kabhi chashm-e-zamana men na pinhan honge
ham har ik daur men har dil men numayan honge
dard ban kar nafas-e-jan men sama ja.enge
soz ban kar haram-e-dil men farozan honge
ham ḳhizan ho ke bhi hain raunaq-e-bazm-e-alam
ham na honge to kahan jashn-e-baharan honge
ham jalenge ki tire naam ki lo raushan ho
ham ba-har-rang tiri ziist ka saman honge
sozish-e-dard men hai ‘arsh’ qayamat pinhan
vo bhi kya honge jo is dard ka darman honge
Leave a Reply