Kai Aks Mah-E-Tamam the Mujhe Kha Gae

Liyaqat Ali Aasim

ka.i aks mah-e-tamam the mujhe kha ga.e

vo jo ḳhvab se lab-e-bam the mujhe kha ga.e

koi raakh thi jo sulag rahi thi idhar udhar

vo jo rang-e-saya-e-sham the mujhe kha ga.e

vo jo ansuon ki zaban thi mujhe pi ga.i

vo jo bebasi ke kalam the mujhe kha ga.e

vo jo manzilon ki dua.en thiin nahin le ga.iin

vo jo raste ke salam the mujhe kha ga.e

vo jo bikhre bikhre se log the mire rog the

vo jo muttasil dar-o-bam the mujhe kha ga.e

kabhi ye ghalat kabhi vo ghalat kabhi sab ghalat

ye ḳhayal-e-puḳhta jo ḳhaam the mujhe kha ga.e