insani darinde aur is asani se mar jaa.en
ye sochne baiThen to pareshani se mar jaa.en
vo jin ko mayassar thi har ik chiz-e-digar bhi
mumkin hai suhulat ki faravani se mar jaa.en
kashti pe the kashti ko jalate hue hazrat
ab aag se bach jaa.en bhale paani se mar jaa.en
a.ine ka ye kaun sa session hai hamen kya
divar ko takte hue hairani se mar jaa.en
‘babar’ koi jazbati kronon se ye puchhe
kis khate men ham aap ki nadani se mar jaa.en
ai dost mukammal nazar-andaz hi kar dekh
aisa na ho ham niim nigahbani se mar jaa.en
bach jaa.en to aḳhir kise kya farq paḌega
dushman na sahi dost pashemani se mar jaa.en
ankhon men utarte hue itra.en sitare
suraj hon to jal kar tiri peshani se mar jaa.en
ranjhe ko to phir hiir ki tasvir bahut hai
ji karta tha lag kar usi marjani se mar jaa.en
Leave a Reply