aazim-kohli

Kidhar Ka Tha Kidhar Ka Ho Gaya Hun

kidhar ka tha kidhar ka ho gaya huun

musafir kis safar ka ho gaya huun

khuda us ko sada pur-nur rakkhe

main taara jis nazar ka ho gaya huun

dhare jaenge sab ilzam mujh par

main hissa har khabar ka ho gaya huun

mujhe ayyariyan sab aa gai hain

main ab tere nagar ka ho gaya huun

tiri nazron ke ik farman hi se

main qaidi umr bhar ka ho gaya huun

mujhe ab ishq mitti se nahin hai

main ashiq mal-o-zar ka ho gaya huun

rivayat chhod baitha huun main apni

main dushman apne ghar ka ho gaya huun

vo jis ko shaeri kahte hain ‘azim’

main ghayal us hunar ka ho gaya huun

More Poems

Leave a Comment