na khincho ashiq-tishna-jigar ke tiir pahlu se
nikale par hai misl-e-mahi-e-tasvir pahlu se
na le ai navak-afgan dil ko mere chiir pahlu se
ki vo to ja chuka saath aah ke juun tiir pahlu se
dil-e-sipara ko le taank tavizon men haikal ke
na sarka ye hamail ai but-e-be-pir pahlu se
vo hon be-dast-o-pa bismil rasai jab na haath aai
kiya ta pa-e-qatil az tah-e-shamshir pahlu se
asir-e-zulf divane hain dekh ai pasban shab ko
daba kar baith un ke paanv ki zanjir pahlu se
musavvir laila o majnun ki nakami pe hairan hain
kabhi baitha na mil kar pahlu-e-tasvir pahlu se
ye dil lab-tishna tegh-e-yar ka hai raat bhar karta
sada-e-al-atish juun nala-e-shab-gir pahlu se
ajab hasrat ka aalam tha ki majnun kahta tha paiham
chhute pahlu mire mahmil ka ya taqdir pahlu se
na kahna ustukhvan un ko ye aalam laghari ka hai
ki hai dikhla raha mera dil-e-dil-gir pahlu se
khayal-e-abru-e-janan nahin ab bhulta ik dam
sipahi hai juda karta nahin shamshir pahlu se
tamam ahl-e-sukhan bazm-e-sukhan men ‘zauq’ hairan hain
mila jo qafiya tu ne kiya tahrir pahlu se
Leave a Reply