abbas-tabish

Hawa-e-Tez Tera Ek Kaam Aakhiri Hai

hava-e-tez tira ek kaam akhiri hai

ki nakhl-e-khushk pe mah-e-tamam akhiri hai

main jis sukun se baitha huun is kinare par

sukun se lagta hai mera qayam akhiri hai

phir is ke baad ye bazar-e-dil nahin lagna

kharid lijiye sahib ghulam akhiri hai

guzar chala huun kisi ko yaqin dilata hua

ki lauh-e-dil pe raqam hai jo naam akhiri hai

tabhi to ped ki ankhon men chand bhar aaya

kisi ne kah diya hoga ki shaam akhiri hai

ye lag raha hai mohabbat ke pahle ziine par

ki jis maqam pe huun ye maqam akhiri hai

kisi ne phir se khade kar diye dar-o-divar

khayal tha ki mira inhidam akhiri hai

hamare jaise vahan kis shumar men honge

ki jis qatar men majnun ka naam akhiri hai

shuru-e-ishq men aisi udasiyan ‘tabish’

har ek shaam ye lagta hai shaam akhiri hai

More Poems

Leave a Comment