Zulfiqar Zaki
mire raqib se hans kar kalam karte hue
guzar gaya hai vo mujh ko salam karte hue
ajab ki Dubne vaala to mutma.in hai magar
Dara hua hai samundar ye kaam karte hue
vo jis ke samne saste men rakh diya ḳhud ko
ulajh paḌa hai vo gahak bhi daam karte hue
mire vajud pe qabiz hua vo pal bhar men
nazar ki tegh se dil ko ghulam karte hue
bache-kuchhe se ye pal bhi guzar hi ja.enge
kisi ki yaad men sahil pe shaam karte hue
qasam ḳhuda ki ye girya na dekh pa.unga
ḳhushi se ja.iye rishta tamam karte hue
‘zaki’ ye pyaar hi pahchan ban gaya meri
main ḳhaas ho gaya ulfat ko aam karte hue
Leave a Reply