Tanweer Gauhar
batil-o-na-haq se ummid-e-karam karte rahe
jo na karna tha hamen vo kaam ham karte rahe
zabt kar sakte the aḳhir zabt ham karte rahe
kaam tha jin ka sitam karna sitam karte rahe
zindagi-bhar muskura.e be-sabab ham dosto
zindagi-bhar ziist ki talḳhi ko kam karte rahe
ai qaza tu der se aa.i magar ḳhush-amdid
umr-bhar ham yaad tujh ko dam-ba-dam karte rahe
umr-bhar ham ne kiya hai dusron ka ehtiram
ya.ani ḳhud ko umr-bhar ham mohtaram karte rahe
umr paḌhne likhne ki ghaflat men guzri aur phir
zindagi-bhar haath arman-e-qalam karte rahe
kya namazen hain hamari kya hamari bandagi
khoT niyyat men raha aur sar ko ḳham karte rahe
Leave a Reply