suraj ki mizan liye ham, vo the barf ki baaT liye
is halat men ham donon ne apne jivan kaaT liye
ek hi ghar men rahte the ham lekin donon anjane the
jab is ka ehsas hua to apne raste paaT liye
koi gahak mil jaata to achchhi qimat mil jaati
biich ḳharidaron ke the ham apne hunar ki baaT liye
rajaon ka daur gaya aur saath zamin-dari bhi ga.i
lekin gaanv ka mukhiya jiita hai navabi ThaaT liye
‘azam’ is vahshi duniya men ham ne ye bhi dekha hai
ḳhuun baha jo apnon ka vo ḳhuun apnon ne chaaT liye
Leave a Reply