Ravish Siddiqi
umr-e-abad se ḳhizr ko be-zar dekh kar
ḳhush hon fusun-e-nargis-e-bimar dekh kar
kya jalva-gah-e-hasrat-e-nazzara hai bahisht
hairan huun surat-e-dar-o-divar dekh kar
baada ba-qadr-e-zarf sahi rasm-e-mai-kada
saaqi nazakat-e-dil-e-mai-ḳhvar dekh kar
ab justuju-e-dost ki manzil kahin bhi ho
ham chal paḌe hain raah ko dushvar dekh kar
shayan-e-jurm-e-ishq na thi qaid-e-zindagi
ji shaad ho gaya rasan-o-dar dekh kar
ab is se kiya gharaz ye haram hai ki dair hai
baiThe hain ham to saya-e-divar dekh kar
ab hashr tak hijab-nashin hai nigah-e-shauq
chhupna tha rang-e-hasrat-e-didar dekh kar
raz-e-farogh-e-aḳhir-e-shab kuchh na khul saka
kyuun ḳhush hai sham.a sub.h ke asar dekh kar
saz-e-ghazal uTha hi liya ham ne ai ‘ravish’
is chashm-e-nim-baz ka israr dekh kar
Leave a Reply