Umr-E-Abad Se KHizr Ko Be-Zar Dekh Kar

umr-e-abad se ḳhizr ko be-zār dekh kar

ḳhush hoñ fusūn-e-nargis-e-bīmār dekh kar

kyā jalva-gāh-e-hasrat-e-nazzāra hai bahisht

hairāñ huuñ sūrat-e-dar-o-dīvār dekh kar

baada ba-qadr-e-zarf sahī rasm-e-mai-kada

saaqī nazākat-e-dil-e-mai-ḳhvār dekh kar

ab justujū-e-dost kī manzil kahīñ bhī ho

ham chal paḌe haiñ raah ko dushvār dekh kar

shāyān-e-jurm-e-ishq na thī qaid-e-zindagī

jī shaad ho gayā rasan-o-dār dekh kar

ab is se kiyā ġharaz ye haram hai ki dair hai

baiThe haiñ ham to sāya-e-dīvār dekh kar

ab hashr tak hijāb-nashīñ hai nigāh-e-shauq

chhupnā thā rañg-e-hasrat-e-dīdār dekh kar

rāz-e-faroġh-e-āḳhir-e-shab kuchh na khul sakā

kyuuñ ḳhush hai sham.a sub.h ke āsār dekh kar

sāz-e-ġhazal uThā hī liyā ham ne ai ‘ravish’

is chashm-e-nīm-bāz kā isrār dekh kar

Leave a Comment