avvalin chand ne kya baat sujhai mujh ko
yaad aai tiri angusht-e-hinai mujh ko
sar-e-aivan-e-tarab naghma-sara tha koi
raat bhar us ne tiri yaad dilai mujh ko
dekhte dekhte taron ka safar khatm hua
so gaya chand magar niind na aai mujh ko
inhi ankhon ne dikhae kai bharpur jamal
inhin ankhon ne shab-e-hijr dikhai mujh ko
saae ki tarah mire saath rahe ranj o alam
gardish-e-vaqt kahin raas na aai mujh ko
dhuup idhar Dhalti thi dil Dubta jaata tha idhar
aaj tak yaad hai vo sham-e-judai mujh ko
shahr-e-lahore tiri raunaqen daaim abad
teri galiyon ki hava khinch ke laai mujh ko