Sewak Nayyar
hua hai har tarah pamal qalb-e-na-tavan mera
bigaḌega bhala ab aur kya ye asman mera
suna.un apni rudad-e-mohabbat kis ko duniya men
na koi ham-nafas mera na koi raz-dan mera
nazar se duur hai manzil abhi hai bebasi apni
bhaTakta hai abhi rah-e-junun men karvan mera
hazaron andhiyan aa.en hazaron bijliyan chamken
rahega hashr tak abad yunhi gulsitan mera
junun-o-hosh ki har kaifiyat se be-ḳhabar ho kar
tumhari yaad men Duuba hai qalb-e-na-tavan mera
main har ik azma.ish ke liye tayyar huun ‘nayyar’
vo jis tarah bhi chahen shauq se len imtihan mera
Leave a Reply