Saeed Shahidi
is tarah yaad aane se kya fa.eda
muft ehsan jatane se kya fa.eda
jis jagah dil hi jhukta nahin aap ka
us jagah sar jhukane se kya fa.eda
ḳhatm kuchh dam men ho ja.egi raushni
sham.a ki lau baḌhane se kya fa.eda
apne dushman se vaqif to hain ham magar
naam us ka batane se kya fa.eda
khul ke hansiye tabahi pe meri huzur
zer-e-lab muskurane se kya fa.eda
apne dil se main karta huun aksar saval
un ki mahfil men jaane se kya fa.eda
aur ubhrenge naqsh-e-qadam aap ke
meri turbat miTane se kya fa.eda
nichi nazren uThate to ik baat thi
jaam aage baḌhane se kya fa.eda
jin ko aata tha vo to na aa.e ‘sa.id’
mausam-e-gul ke aane se kya fa.eda
Leave a Reply