Hameed Almas
phir kisi yaad ka darvaza khula ahista
kaun aata hai chala aa.e zara ahista
dam-zadan men nahin ja.egi bahar-e-gulshan
aable phuTenge ai abla-pa ahista
baat vo saaf hi kab thi jo samajh men aati
mujh se kuchh kahti rahi chashm-e-haya ahista
shaam hai ek sitara hai sar-e-charḳh-e-vafa
maang us vaqt koi dil se dua ahista
haa.e us shaḳhs pe kya janiye kya guzri thi
baton baton men tire ghar se uTha ahista
hijr ki raat hai pichhle ka saman hai ‘almas’
dard ahista zara bad-e-saba ahista
Leave a Reply