Sau Sadiyon Ka Nauha Hai

Poet

sau sadiyon ka nauha hai

tum kahte ho naghma hai

dhuul udati jhiryon men

tahzibon ka malba hai

mitti ke do kuzon men

kuchh khvabon ka girya hai

resham hi se udhdega

ye phulon ka bakhiya hai

jitna bhi tum saaf karo

dhabba akhir dhabba hai

is ghar ki virani ka

jangal jaisa huliya hai

dar aati hai chupke se

yaad pe kis ka pahra hai

ankhon ki virani se

dil ko lahaq khatra hai