jab main suna ki yaar ka dil mujh se haT gaya
sunte hi is ke mera kaleja ulaT gaya
farhad tha to shirin ke gham men mua gharib
laila ke gham men aan ke majnun bhi laT gaya
main ishq ka jala huun mira kuchh nahin ilaaj
vo peḌ kya hara ho jo jaḌ se ukhaT gaya
itna koi kahe ki divane paḌa hai kya
ja dekh abhi udhar koi pariyon ka ghaT gaya
chhina tha dil ko chashm ne lekin main kya karun
uupar hi uupar us saf-e-mizhgan men paT gaya
kya khelta hai naT ki kala ankhon ankhon men
dil saaf le liya hai jo puchha to naT gaya
ankhon men meri sub.h-e-qayamat ga.i jhamak
siine se us pari ke jo parda ulaT gaya
sun kar lagi ye kahne vo ayyar-e-naznin
”kya bolen chal hamara to dil tujh se phaT gaya”
jab main ne us sanam se kaha kya sabab hai jaan
iḳhlas ham se kam hua aur pyaar ghaT gaya
aisi vo bhari mujh se hui kaun si ḳhata
jis se ye dil udaas hua ji uchaT gaya
ankhen tumhari kya phirin us vaqt ”meri jan”
sach puchhiye to mujh se zamana ulaT gaya
ushshaq jan-nisaron men main to imaam huun
ye kah ke main jo us ke gale se lipaT gaya
kitna hi us ne tan ko chhuḌaya jhiḌak jhiḌak
par main bhi qainchi bandh ke aisa chimaT gaya
ye kashmakash hui ki gareban mira udhar
TukḌe hua aur us ka dupaTTa bhi phaT gaya
aḳhir isi bahane mila yaar se ‘nazir’
kapḌe bala se phaT ga.e sauda to paT gaya
Leave a Reply