yuun qaid ham hue ki hava ko taras ga.e
apne hi kaan apni sada ko taras ga.e
the kya ajiib log ki jiine ke shauq men
ab-e-hayat pi ke hava ko taras ga.e
kuchh roz ke liye jo kiya ham ne tark shahr
bashindagan-e-shahr jafa ko taras ga.e
murda adab ko di hai na.i zindagi magar
bimar ḳhud paḌe to dava ko taras ga.e
ḳhali jo apna jism lahu se hua ‘qamar’
kitne hi haath rang-e-hina ko taras ga.e
Leave a Reply