jo ishq chahta hai vo hona nahin hai aaj
ḳhud ko bahal karna hai khona nahin hai aaj
ankhon ne dekhte hi use ghul macha diya
tai to yahi hua tha ki rona nahin hai aaj
ye raat ahl-e-hijr ke ḳhvabon ki raat hai
qissa tamam karna hai sona nahin hai aaj
jo apne ghar men hai vo hai bazar men nahin
hona kisi ka shahr men hona nahin hai aaj
phir tifl-e-dil hai daulat-e-duniya pe girya-bar
aur mere paas koi khilauna nahin hai aaj
Leave a Reply