sang-dil huun is qadar ankhen bhigo sakta nahin
main ki pathrili zamin men phuul bo sakta nahin
lag chuke hain damanon par jitne rusva.i ke daagh
in ko aansu kya samundar tak bhi dho sakta nahin
ek do dukh hon to phir un se karun ji-bhar ke pyaar
sab ko siine se laga luun ye to ho sakta nahin
teri barbadi pe ab aansu baha.un kis liye
main to ḳhud apni tabahi par bhi ro sakta nahin
jis ne samjha ho hamesha dosti ko karobar
dosto vo to kisi ka dost ho sakta nahin
ḳhvahishon ki nazr kar duun kis liye anmol ashk
kachche dhagon men koi moti piro sakta nahin
main tire dar ka bhikari tu mire dar ka faqir
aadmi is daur men ḳhuddar ho sakta nahin
mujh ko itna bhi nahin hai surḳh-ru hone ka shauq
be-sabab taaza lahu ki fasl bo sakta nahin
yaad ke sho.alon pe jalta hai agar mera badan
oḌh kar phulon ki chadar tu bhi so sakta nahin
haath jis se kuchh na aa.e us ki ḳhvahish kyuun karun
duudh ki manind main paani bilo sakta nahin
Leave a Reply