na ḳhat likhe na diye un ko taar ab ke baras
guzar ga.i yuun hi saari bahar ab ke baras
na so.e raat ko ja kar khuli hui chhat par
kiye na ham ne sitare shumar ab ke baras
guzishta saal bhi dil be-qarar tha lekin
ajiib tarah ki uljhan hai yaar ab ke baras
kisi bhi lab pe tabassum ke gul nahin mahke
kisi bhi aankh se chhalka na pyaar ab ke baras
ye rang kyuun nahin jachte miri nigahon men
ye phuul kyuun mujhe lagte hain ḳhaar ab ke baras
na jaane kis tarah logon ke din guzarte hain
kisi ke ruḳh pe nahin hai nikhar ab ke baras
karoge kaise ‘ḳhalish’ apni be-kali ka ilaaj
sharab men bhi nahin hai ḳhumar ab ke baras
Leave a Reply